29/03/2020

ທີມແພດ ແລະ ຊ່ຽວຊານຈາກ ສປ ຈີນ ຈໍານວນ 12 ທ່ານໄດ້ເດີ່ນທາງຮອດລາວແລ້ວ
ທີມແພດ ແລະ ຊ່ຽວຊານຈາກ ສປ ຈີນ ຈໍານວນ 12 ທ່ານໄດ້ເດີ່ນທາງຮອດລາວແລ້ວ ພ້ອມດ້ວຍອຸປະກອນການແພດຈຳນວນໜຶ່ງ ເດີນທາງເຖິງສະໜາມບິນສາກົນວັດໄຕ ໃນ ເວລາ 11:12 ໂມງ ວັນທີ 29 ມີນາ 2020, ເພື່ອມາຊ່ວຍ ສປປ ລາວ ໃນການຕ້ານ ແລະ ສະກັດກັ້ນ ກັບໄວຣັດ ໂຄວິດ-19.
ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທັງເປັນຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ຫລື ໂຄວິດ-19, ທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ ແລະ ເຈົ້າໜ້າທີ່ຈາກສະຖານເອກອັກຄະລັດຖະທູດ ແຫ່ງ ສປ ຈີນ ປະຈຳນະຄອນຫລວງວຽງຈັນ ໄດ້ໃຫ້ກຽດຕ້ອນຮັບຄະນະດັ່ງກ່າວທີ່ສະໜາມບິນ ຢ່າງເປັນທາງການ ແລະ ສົມກຽດ.
ແຜນການເຮັດວຽກຢູ່ ສປປ ລາວ ຂອງຄະນະແພດ ແລະ ຊ່ຽວຊານ ແມ່ນຈະດຳເນີນເປັນເວລາທັງໝົດ 14 ວັນ ໂດຍຈະແບ່ງປັນປະສົບການກັບຝ່າຍລາວ ໃນການປ້ອງກັນ ແລະ ຄວບຄຸມພະຍາດ ໂຄວິດ-19, ກວດຄັດກອງຫາຜູ້ຕິດເຊື້ອ, ກວດວິເຄາະເຊື້ອພະຍາດຢູ່ຫ້ອງທົດລອງ ແລະ ປິ່ນປົວຄົນເຈັບ, ລວມທັງແລກປ່ຽນບົດຮຽນກັບກະຊວງສາທາລະນະສຸກ ແລະ ໂຮງໝໍສູນກາງຂອງ ສປ ລາວ.
ການຊ່ວຍເຫຼືອ ຂອງ ລັດຖະບານ ສປ ຈີນ ໃນຄັ້ງນີ້, ຍັງມີ ໜ້າກາກອະນາໄມທົ່ວໄປ ຈຳນວນ 400000 ອັນ, ໜ້າກາກອະນາໄມ N95 ຈຳນວນ 5000 ອັນ, ເສື້ອຊຸດປ້ອງກັນຕົວເອງ ຈຳນວນ 5000 ອັນ ແລະ ນ້ຳຢາກວດຫາເຊື້ອພະຍາດໂຄວິດ-19 ຈຳນວນ 20064 ຊຸດ ເພື່ອໃຊ້ເຂົ້າໃນການປ້ອງກັນ ແລະ ສະກັດກັ້ນພະຍາດດັ່ງກ່າວ.